BabyCenter-ээс дараах зүйлсийг охинтой эцэг эхчүүдэд зөвлөжээ.
Өөртөө итгэлтэй байхад сурга. Том хүний өөдөөс үг хэлдэггүй юм гэж сургахын оронд өөрт үүсэж буй бэрхшээл болон хэрэгцээгээ эелдгээр хэлж, ярьж сурахад нь туслаарай.
Давуу талыг нь тодотгон урам өг. Миний охин үнэхээр ухаантай, мундаг шүү гэж ерөнхий магтаал хэлэлгүй миний охин юмыг маш хурдан сурах юмаа, юмыг маш сайн тогтоож байна гэх зэргээр тодорхой давуу талыг нь тодотгон, урам хайрлаж байгаарай.
Бодит байдлаас хэт дөвийлгөн магтах хэрэггүй. Хэдэн ч настай вэ хүүхэд өөрийнхөө юу хийж чадаж байгаа болон чадахгүй байгаагаа барагцаалж байдаг. Түүнээс нь хэтрүүлэн магтах нь хүүхдийг өөртөө эргэлзэхэд хүргэдэг. Тиймээс ахадсан магтаалаар булалгүй өмнөх долоо хоног, өнгөрсөн сарынх нь үр дүнтэй харьцуулж магтаарай.
Хүн бүр цаг ямагт түүнд анхаарал хандуулж, түүнийг л гэх боломжгүй гэдгийг ойлгоход нь туслаарай. Нэг хүүхэд түүнтэй нөхөрлөх дуртай байхад өөр нэгэн дургүй байж болно гэдгийг ойлгуулснаар охин тань бусдаас хамааралтай бус, бие даасан нэгэн болж төлөвших боломжтой.
Авьяас чадвар, хичээл зүтгэлийг нь дэмж. Аливаа зүйлийг хийхдээ тусламж хүсэх бүрд нь яаран бүү туслаарай. Өөрөө бие даан хийх боломжтой зүйлсийг өөрт нь даатга. Харин чадахгүй зүйлд нь тусалж дэмжээрэй.
Спортоор хичээллэхийг хүсвэл сонирхлыг нь дэмжээрэй. Эрэгтэй хүүхдийн хийдэг зүйл гэх зэргээр хүйсээр нь ялгаварлаж хэрхэвч болохгүй.
Эмэгтэй хүүхэд гэдгээр нь нийтлэг давуу болон сул талыг түүнд нялзаах хэрэггүй. Өөрийн давуу сул талыг олж түүнийгээ ойлгоход нь туслаарай.
Заяагдмал царай төрхөөс илүү эрүүл, чийрэг биеийг нь магтан сайшаа. Миний охин үнэхээр хөөрхөн, үзэсгэлэнтэй гэхээс илүү миний охин дасгал хөдөлгөөн сайн хийдэг учраас чийрэг, эрүүл биетэй байна гэх зэргээр хичээл зүтгэлийнх нь үр дүнг магт.
Эрэгтэй, эмэгтэй хүүхдийн ялгааг ойлгуулах нь чухал ч хүн бүр эрх тэгш байх эрхтэй гэдгийг ойлгуулахыг хичээгээрэй.